- Ellipses Pharma obtén os dereitos globais exclusivos para desenvolver e comercializar SRB22, en tumores sólidos
SunRock Biopharma S.L. (“SunRock”), unha empresa biofarmacéutica que está a desenvolver unha carteira de anticorpos biespecíficos innovadores para tratar o cancro incurable, e Ellipses Pharma Limited (“Ellipses”), unha compañía global de desenvolvemento de fármacos centrada en acelerar o desenvolvemento de novos tratamentos oncolóxicos, anuncian que asinaron un acordo de licenza exclusivo para SRB22, unha proteína de fusión HER3:TRAIL bifuncional completamente humana, que no futuro coñecerase como EP0017.
Este acordo supón un fito para a biotecnoloxía galega e demostra a madurez que está a alcanzar un sector en continuo crecemento durante os últimos anos na comunidade. O anticorpo desenvolvido pola empresa compostelá é a primeira molécula licenciada por Ellipses Pharma en España e foi desenvolto en Galicia durante os últimos anos. Para a consecución deste logro foi fundamental o apoio da Xunta de Galicia que, a través de XesGalicia, participa no accionariado da compañía desde os seus inicios en 2015.
Segundo o acordo, a Ellipses outorgáronselle os dereitos globais para desenvolver e comercializar EP0017 e asumirá o custo total e a responsabilidade do desenvolvemento preclínico e clínico restante do composto. De acordo con a súa estratexia, Ellipses ten a intención de licenciar EP0017 para a súa comercialización se se demostra que é seguro e eficaz nos ensaios clínicos. SunRock continuará participando, a través dun acordo de servizo con Ellipses, no desenvolvemento de EP0017 para garantir que as actividades traslacionales sexan eficientes. Se Ellipses transfire a outra empresa as licenzas de EP0017, SunRock tamén recibirá pagos por fitos e regalías.
EP0017 é unha proteína de fusión bifuncional, a primeira na súa clase a nivel global, cun mecanismo de acción dual. Diríxese selectivamente a HER3, que se sobre expresa en varios tipos de tumores diferentes e, ademais, únese aos receptores de morte tumoral DR4 e DR5, o que induce a morte das células tumorales. Xeráronse datos prometedores nunha variedade de modelos preclínicos que demostran o potencial de EP0017.
Laureano Simón, Ph.D., CEO de SunRock Biopharma, dixo:
“O acordo con Ellipses acelerará o desenvolvemento de EP0017, movendo este activo que pode cambiar a vida cara á clínica e logo, con sorte, cara aos pacientes con cancro que necesitan desesperadamente enfoques novos para combater os tumores invasivos”.
Rajan Jethwa, MD, CEO de Ellipses Pharma comentou:
“A nosa misión é desenvolver rapidamente terapias innovadoras contra o cancro, levar estas terapias á clínica o máis rápido posible e potencialmente salvar máis vidas. Estamos entusiasmados coa oportunidade de avanzar no desenvolvemento deste activo prometedor e esperamos traballar con SunRock para acelerar o traballo preclínico”.
